Arkadag şäherinde Halkara zenanlar güni ýokary derejede giňden bellenilip geçiler. Köp çagaly maşgalalara ýaşaýyş jaýlarynyň, şol sanda kottejleriň açarlary dabaraly ýagdaýda gowşurylar. Bu barada Türkmenistanyň Halk Maslahatynyň Başlygy Gurbanguly Berdimuhamedowyň 8-nji fewralda Arkadag şäherine amala aşyran iş saparynyň çäklerinde bellenilip geçildi. Muny TDH habar berýär.
Iş saparynyň çäklerinde Gurbanguly Berdimuhamedow Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi.
D.Orazow häzirki döwürde täze şäherde alnyp barylýan işleriň ýagdaýy, şeýle hem gurulmagy meýilleşdirilýän desgalaryň taýýarlanylan taslamalary we gurluşyk işlerinde ulanylýan serişdeleriň görnüşleri barada hasabat berdi.
Arkadag şäheriniň häkimi G.Mämmedowa täze şäheriň döwrebap ýaşaýyş jaýlaryna ilaty göçürip getirmek işleri bilen bir hatarda, täze şäherde degişli arassaçylyk we abadanlaşdyryş işleriniň talabalaýyk ýola goýlandygy barada hasabat berdi.
Şeýle hem häkim Türkmenistanyň Prezidentiniň satyn alyp beren kuwwatly tehnikalarynyň netijeli peýdalanylmagy bilen şäherde arassaçylyk we abadanlaşdyryş işleriniň ýokary derejede saklanýandygyny habar berdi.
Türkmen halkynyň Milli Lideri Arkadag şäherinde bina edilen we ýokary derejeli amatlyklary özünde jemleýän ýaşaýyş jaýlaryna ilaty göçürip getirmek işleriniň talabalaýyk alnyp barylmalydygyny belledi.
