Birnäçe ýyl bäri zenanlaryň erkeklere garanyňda has köp gepleýändigi barada düşünjeler bardy. Emma «Journal of Personality and Social Psychology» žurnalynda çap edilen täze gözleg, bu düşünjäniň diňe belli bir derejede dogrudygyny görkezdi: zenanlar hakykatdanam has köp gepleýär, ýöne diňe 25 bilen 64 ýaş aralygynda.
Alymlar ABŞ-dan, Şweýsariýadan, Serbiýadan we Awstraliýadan 2197 sany adamyň 630 müňden gowrak söhbetdeşlik ýazgylaryny seljerip gördüler. Bu maglumatlar 14 ýyllyk döwürde, tebigy gepleşikleriň ýazgysyny alýan ýörite enjam arkaly ýygnaldy.
Netijeler, zenanlaryň erkeklerden günde ortaça 1073 söz köp aýdýandygyny görkezdi. Emma bu tapawut adamlaryň ýaşyna baglylykda üýtgeýär.
Ýetginjekleriň arasynda bolsa, gyzlaryň günde oglanlara garanyňda 513 söz köpräk gepleýändigi anyklansa, 18-24 ýaş aralygyndaky ýaşlarda bu tapawut 841 söze ýetdi.
Emma iň uly tapawut 25-64 ýaş aralygyndaky toparda ýüze çykdy: bu ýaşdaky zenanlar erkeklerden günde ortaça 3275 söz köpräk gepleýärdi. Diňe şu ýaş toparyndaky tapawut statistiki taýdan düýpli derejede hasaba alyndy.
Gözlegi geçirýänler bu ýagdaýy zenanlaryň jemgyýetdäki sosial wezipeleri bilen baglanyşdyrýarlar. Kämillik ýaşyna ýeten zenanlar köplenç çagalar we garyndaşlar bilen aragatnaşyk saklamaly bolýarlar, bu hem olaryň has köp söz aýtmagyna sebäp bolýar. Emma 65 ýaşdan soň bu ýagdaý üýtgeýär we erkekler günde ortaça 788 söz köpräk gepläp başlaýarlar.
Şeýle-de, gözlegler adamlaryň soňky ýyllarda has az gepleýändigini ýüze çykardy. Eger 2007-nji ýylda bir adam ortaça günde 16 müň söz aýdýan bolsa, 2019-njy ýylda bu san 13 müňe çenli azaldy. Alymlar muny aragatnaşyk endikleriniň üýtgemegi bilen baglanyşdyrýarlar – adamlar indi gepleşikleriň deregine çat we messenjerler arkaly habarlaşmagy has makul görýärler.
