28-nji ýanwarda Aşgabatda «Bitewi saglyk» taslamasy boýunça ýyllyk Milli utgaşdyryjy maslahat geçirildi. Merkezi Aziýa döwletleri pandemiýalaryň öňüni almak, olara taýynlygy üpjün etmek we jogap çärelerini işläp düzmek boýunça bu başlangyjy bilelikde durmuşa geçirýärler diýip, "Türkmenistan: Altyn asyr" elektron neşiri habar berýär.
Taslama BMG-niň Azyk we oba hojalygy guramasy, BMG-niň Daşky gurşaw boýunça maksatnamasy, Bütindünýä Banky we Bütindünýä saglygy goraýyş guramasyny öz içine alýan dörttaraplaýyn bileleşik tarapyndan goldanýar.
Taslamanyň esasy maksady pandemiýalara garşy göreşmek üçin weterinar, lukmançylyk we ekologiýa ulgamlaryny güýçlendirmekden ybarat. Bu başlangyç geljekde ýüze çykyp biljek saglyk, ykdysady we ekologiýa howplarynyň täsirini azaltmaga hem ýardam edýär.
Maslahata Türkmenistanyň Maliýe we ykdysadyýet ministrliginiň, Saglygy goraýyş we derman senagaty ministrliginiň, Döwlet weterinariýa gullugynyň, Oba hojalygy we daşky gurşawy goramak ministrliginiň hem-de beýleki gyzyklanýan taraplaryň wekilleri gatnaşdylar.
Çäräniň dowamynda gatnaşyjylar gazanylan ösüşi seljerip, indiki ädimleri ara alyp maslahatlaşdylar we guramalaryň arasyndaky utgaşyklygy gowulandyrmak üçin tejribelerini paýlaşdylar.
