ABŞ-da «Magtymguly Pyragy» türkmen-özbek filminiň ýörite görkezilişi boldy. Film Nýu-Ýork şäherindäki Türk öýünde görkezildi.
Türkmenistanyň we Özbegistanyň Prezidentleriniň goldamagynda düşürilen bu film Aşgabatda geçirilen «Gorkut ata» IV halkara kinofestiwalynyň baş baýragyna mynasyp bolupdy. Ol türkmen edebiýatynyň nusgawy şahyrynyň hatyrasyna we türki dünýäsiniň möhüm medeni gymmatlygyna bagyşlanýar.
Görkezilişde filmiň režissýory Muzaffarhon Erkinow türkmen kinematografiýaçylary bilen bilelikde alnyp barlan işler baradaky täsirlerini paýlaşdy.
"Biziň filmimiz iki halkyň jebisligini, mundan başga-da, bütin türki dünýäsiniň agzybirligini görkezýär. Biz bu taslamany Türkmenistanda we Özbegistanda düşürdik, filmi ýazgy edýän 50-den gowrak meýdançalary döretdik hem-de uly möçberli işleri alyp bardyk. Bizi dilimiz, dinimiz we medeniýetimiz birleşdirýär, şoňa görä-de, şeýle jebisligi kino sungatynyň üsti bilen görkezmek biziň üçin uly hormat boldy".
Baş keşbi ýerine ýetiriji, ýaş aktýor Ahmet Amandurdyýew uly ekranda beýik akyldar Magtymguly Pyragynyň keşbini janlandyrmagyň özi üçin belent hormat bolandygyny buýsanç bilen gürrüň berdi.
TÜRKSOÝ-yň baş sekretary Sultan Raýew öz çykyşynda bu filmiň Türkmenistanyň we Özbegistanyň arasyndaky diňe bir medeni aragatnaşyklary berkidýän uly alamat bolman, eýsem, türki dünýäsiniň jebisliginiň hem nyşanydygyny belledi.
«Magtymguly Pyragy» filmine bagyşlanan maksatnamanyň çäklerinde BMG-niň ýanyndaky birnäçe ýurtlaryň hemişelik wekilleriniň, artistleriň, hökümete degişli däl guramalaryň ýolbaşçylarynyň hem-de beýleki myhmanlaryň gatnaşmagynda giň gerimli çäreler geçirildi.
