Türkmenistanda Watan goragçylarynyň güni mynasybetli Döwlet gümrük gullugy tarapyndan yglan edilen «Göreldeli gümrük işgäri» we «Ýylyň gümrük nokady» bäsleşikleriniň jemleri jemlenildi.
Gullugyň hukuk tertibini, kanunçylyk binýadyny berkitmäge we kämilleşdirmäge goşan şahsy goşantlary, gulluk borçlaryny göreldeli we birkemsiz ýerine ýetirmekde gazanan ýokary görkezijileri, harby gullukçylary hünär taýdan kämil derejede taýýarlamakda görkezen aýratyn netijeleri boýunça Döwlet gümrük gullugynyň öňdebaryjy harby gullukçylary «Göreldeli gümrük işgäri» bäsleşiginiň ýeňijileri diýlip yglan edildi. Olara degişli şahadatnamalar we gymmat bahaly sowgatlar dabaraly ýagdaýda gowşuryldy.
Şeýle hem Döwlet gümrük gullugynyň edaralarynda harby tertip-düzgüni berjaý edip, gümrük nokadynyň talaba laýyk saklanylyp, daş-töwereginiň abadançylygyny üpjün etmekde şeýle-de 2024-nji ýylyň dowamynda aýratyn ýokary görkezijileri we gulluk işleri nazara alnyp, Gullugyň Lebap welaýat gümrükhanasynyň Farap awtoýol gözegçilik-geçiriş ýerindäki «Farap awtoýollary» gümrük nokady «Ýylyň gümrük nokady» diýlip yglan edildi. Gümrük nokadynyň müdirine degişli şahadatnama gowşuryldy.
