Prezident Serdar Berdimuhamedow Hindistan Respublikasynyň Prezidenti hanym Draupadi Murmuwa hem-de Premýer-ministri Narendra Modä Hindistanyň milli baýramy — Respublika güni mynasybetli mähirli gutlaglaryny, iň gowy arzuwlaryny iberdi.
Döwlet Baştutany Türkmenistan bilen Hindistan Respublikasynyň arasyndaky yzygiderli pugtalanýan hem-de kämilleşýän gatnaşyklaryň ýokary derejesini belläp, syýasy-ykdysady, medeni-ynsanperwer we beýleki ugurlar boýunça ýola goýlan özara bähbitli hyzmatdaşlygyň iki halkyň bähbidine mundan beýläk-de ösdüriljekdigine ynam bildirdi.
Şu ýakymly mümkinçilikden peýdalanyp, Serdar Berdimuhamedow hanym Draupadi Murmuwa hem-de Premýer-ministr Narendra Modä tüýs ýürekden berk jan saglyk, bagtyýarlyk, abadançylyk, Hindistanyň halkyna bolsa parahatçylyk, öňegidişlik hem-de rowaçlyk arzuw etdi.
Şu ýyl Hindistan Respublika gününi 76-njy gezek belläp geçdi. Baýramçylyk Hindistanyň Konstitusiýasynyň kabul edilmeginiň we ýurduň döwlet dolandyryşynyň respublika görnüşine geçmeginiň şanyna bellenilip geçilýär.
