Microsoft korporasiýasynyň hünärmenleri emeli aňyň ulanylyşy bilen bagly töwekgelçilikleri öwrenmek boýunça barlag geçirdiler. Barlagyň netijeleri arXiv preprint serwerinde paýlaşyldy.
Alymlar ýüzden gowrak emeli aň gurallaryny seljerip, emeli aňyň “hiç wagt hem doly derejede howpsuz bolmajakdygy” hakynda netijä geldiler. Uly dil modelleri (LLM) bar bolan howplary güýçlendirip, täze howplary döredip biler. Mysal üçin, modele ýalňyş ýa-da gizlin maglumatlar öwredilse, ol şol maglumatlary ulanyjylara ýaýradyp biler.
Hünärmenler töwekgelçilikleri azaltmak üçin, maglumaty uly dil modellerine öwretmegiň her bir tapgyryny gözegçilikde saklamagy maslahat berýärler. Olaryň pikirine görä, adam faktory emeli aňyň howpsuzlygyny üpjün etmekde hemişe esasy orny eýeleýär.
Şeýle-de hünärmenler, emeli aň bilen işlemek üçin tematiki tejribäni, medeni aýratynlyklara düşünmegi we emosional aň paýyny zerur diýip hasap edýärler.
