Monakonyň Monte-Karlo şäherinde 47-nji halkara sirk sungaty festiwalynda Türkmenistanyň «Galkynyş» milli at üstündäki oýunlar topary altyn baýraga we beýleki ýörite baýraklara mynasyp boldy. Bu barada «Watan» habarlar gepleşiginde habar berildi.
20-nji ýanwarda Monako Knýazlygynda saparynyň çäklerinde Türkmenistanyň Halk Maslahatynyň Başlygy Gurbanguly Berdimuhamedow Fransiýanyň Nissa şäheriniň Halkara howa menzilinde «Galkynyş» milli at üstündäki oýunlar toparynyň wekilleri bilen duşuşdy we olary gazanan uly üstünlikleri – Monte-Karloda halkara sirk sungaty festiwalynda türkmen tuguny belentde parladyp, baş baýraga mynasyp bolmaklary bilen gutlady.
Türkmenistanyň Halk Maslahatynyň Başlygynyň belleýşi ýaly, 2007-nji ýylda döredilen «Galkynyş» milli at üstündäki oýunlar topary dürli ýurtlarda geçirilen halkara sirk festiwallarynda 5 gezek baş baýraga mynasyp bolup, dünýä çempiony diýen belent derejä eýe boldy.
