Singapuryň Flint kompaniýasy tebigata zyýansyz – alty hepdäniň dowamynda çüýräp ýitip bilýän täze kagyz batareýany işläp taýýarlady. Täze batareýa adaty litiý-ion batareýalaryna garanyňda 10 esse arzan we ekologiki taýdan has amatlydyr diýip, Interesting Engineering žurnaly habar berýär.
Bu batareýalar suwa esaslanýan elektrolitleri kagyza siňdirmek arkaly taýýarlanýar. Kagyz batareýanyň gurluşynda daşaýjy (substrat) material hökmünde ulanylýar. Şol sebäpli oňa “kagyz batareýa” diýilýär.
Bu batareýalaryň düzüminde tebigata zyýanly litiý, kobalt we nikel ýaly materiallaryň ýerine, sink we marganes ulanylýar. Täze batareýa ýeňil we çeýe bolup, ol dürli görnüşe eýe bolup bilýär. Şeýle hem ol alty hepdäniň içinde toprakda doly çüýräp, zyýansyz maddalara öwrülýär.
Kagyz batareýalar aşa yssy ýa-da sowuk şertlerde hem işleýär. Şeýle-de, kesilmek, epilmek ýa-da ýakylmak ýaly täsirlerden zeper çekmän, işlemegini dowam etdirýär. Bu bolsa ony adaty batareýalardan has ygtybarly edýär.
Batareýanyň kuwwaty bir enjam üçin ýeterlik bolup, senagat, elektronika we beýleki ugurlarda ulanyp bolýar. Kompaniýa Singapurda täze zawod açmagy we önümçiligi giňeltmegi meýilleşdirýär. Geljekde bu batareýalaryň dünýäniň ähli ýerlerinde ulanylmagyna garaşylýar.
Adaty batareýalar onlarça ýyl çüýremän galýarlar, kagyz batareýalar bolsa alty hepdäniň içinde doly ýitýär we yzynda hiç hili zyýanly madda galdyrmaýar. Bu bolsa daşky gurşawy goramak üçin uly tapawut döredýär.
