Finlýandiýanyň Abo Akademi uniwersitetiniň alymlary Hytaýyň Suçžou nanotehnologiýa we nanobionika institutyndaky kärdeşleri bilen bilelikde organiki Gün batareýalarynyň esasy meselelerini çözdüler. Olar bu enjamlaryň ulanyş möhletini çäklendirýän, tiz zaýalanmagyna sebäp bolýan energiýa ýitgisiniň öňüni almagy başardylar diýip, Interesting Engineering habar berýär.
Synaglaryň dowamynda ters gurluşly we meýdany 1 sm² bolan bu paneller 18%-den ýokary netijelilik görkezdi. Olar ak ýagtylygyň astynda 24,7 müň sagatlap üznüksiz işledi. Bu bolsa takmynan 16 ýyllyk ulanyşa deňdir.
Mundan öň, organiki Gün panelleri ýokary netijelilik görkezse-de (25,44%), olaryň materiallary tiz zaýalanýardy. Emma fin alymlarynyň açyşy bu meseläni çözýär we uzak wagtlap ulanyp bolýan gün batareýalarynyň köpçülikleýin öndürilmegine ýol açýar.
Bu tehnologiýa durnukly energiýa geçiş üçin möhümdir. Täze paneller tebigy ýangyçlara bolan garaşlylygy azaltmaga, daşky gurşawa zyňylýan zyňyndylaryň göwrümini peseltmäge we energiýany uzak sebitlere ýetirmäge ýardam berer.
