Saud Arabystanynyň mirasdüşer şazadasy we premýer-ministri Muhammed bin Salman bin Abdulaziz Al Saud Mekgede “Patyşa Salmanyň derwezesi” (King Salman Gate) atly täze şäher gurluşyk taslamasynyň başlandygyny habar berdi.
Uly toplum, takmynan, 12 million inedördül metr meýdany eýelär we al-Haram metjidiniň golaýynda ýerleşer. Taslama şäher infrastrukturasyny ösdürmäge, mukaddes ýere barmagy has ýeňilleşdirmäge we zyýaratçylar hem Mekgäniň ýaşaýjylary üçin hyzmat derejesini ýokarlandyrmaga gönükdirilýär.
“Patyşa Salmanyň derwezesi” ýaşaýyş, myhmanhana, söwda we medeni zolaklary öz içine alyp, ýaşaýjylar, syýahatçylar we zyýaratçylar üçin häzirkizaman amatlyklary hödürlär. Bu ýerde bir wagtyň özünde 900 müň töweregi adam hem ýapyk binalarda, hem açyk asmanda doga-dileg edip biler.
Taslama gelýän zyýaratçylaryň sanynyň artmagyny goldamaga gönükdiriler hem-de Patyşalygyň ykdysady ösüşiniň möhüm hereketlendirijisi bolar: 2036-njy ýyla çenli 300 müňden gowrak iş ornuny döretmek meýilleşdirilýär. Şeýle-de, bu mega-taslama ykdysadyýeti diwersifikasiýalaşdyrmaga we durnukly ösüşe gönükdirilen Vision 2030 strategiýasynyň maksatlaryny goldaýar.
“Patyşa Salmanyň derwezesiniň” açylmagy Saud Arabystanynyň Mekgäni däp-dessurlaryň we ruhy hem medeni aýratynlygy saklaýan ösüşiň sazlaşygynyň häzirkizaman nyşanyna öwürmekde nobatdaky ädimi bolar.
