Chery kompaniýasynyň suwda ýüzýän Jetour Zongheng G700 ulagy Ýanszy derýasyny özbaşdak kesip geçen ilkinji awtomobil hökmünde taryha girdi. Ulag iki kenaryň arasyndaky 1480 metr aralygy geçip, munuň üçin 22 minut sarp etdi diýip, CarNewsChina habar berýär.
Adaty ýollardan daşary niýetlenen bu awtoulag Chery-nyň ştab-kwartirasynyň ýerleşýän ýeri bolan Uhu şäherindäki Heýşaçžou parom terminalyndan hereket edip başlady we Nanlun parom terminalyna ýetdi. Derýadan “ýüzüş” wagty awtomobil 5-10 km/sag tizlikli derýa akymyna garşy, takmynan, 7 km/sag tizlik bilen hereket etdi.
Autohome-yň maglumatlaryna görä, awtoulag suw geçirmeýän kuzowynyň we iki sany 25 at güýjündäki hereketlendirijisiniň kömegi bilen derýany ýüzüp geçmegi başardy. Awtomobiliň yzky böleginde oturdylan bu hereketlendirijiler suwda hereket etmäge mümkinçilik berýär. Durnuklylyk üçin bolsa kuzowyň kese ýagdaýyny saklaýan alty okly giroskop jogap berýär. Awtomobiliň hereket eden ýolunda derýanyň çuňlugy 15-20 metre ýetýär.
Zongheng G700 – uzynlygy 5198 mm, tigir bazasy 2870 mm we klirensi 320 mm bolan ulagdyr. Onuň gibrid enjamy umumy kuwwaty 761 at güýjüne ýetýän 2 litrlik turbo hereketlendirijisini we iki elektrik hereketlendirijisini öz içine alýar. 100 km/sag çenli tizligi artdyrma 4,6 sekunt wagt alýar, gibrid režimde geçýän menzili 1400 km.
Ýangyjyň sarp edilişi 100 km üçin 1,39 l barabar, 30%-den 80%-e çenli çalt zarýad alyş bolsa 10 minut wagt alýar.
Hytaýda Jetour Zongheng G700-iň satuwy 19-njy oktýabrda açyldy. Baha 349,9 müň ýuandan 429,9 müň ýuana ýetýär (takmynan, 49,1 – 60,3 müň dollar).
