Huawei we JAC kompaniýalaryna degişli bolan Maextro brendi özüniň flagman sedanynyň hakyky altyn çaýylan we ýörite dizaýnly Maextro S800 Grand Design atly aýratyn görnüşini tanyşdyrdy.
Täze awtoulag özboluşly stil çözgütlerini we öňdebaryjy tehnologiýalary hödürleýär, bu bolsa oňa Rolls-Royce ýaly dünýä liderleri bilen bäsleşmäge mümkinçilik berýär, ýöne bahasy olardan iki esse diýen ýaly arzandyr — takmynan, 2 million ýuan (294 000 dollardan gowrak). Deňeşdirmek üçin, Rolls-Royce Ghost modeliniň Hytaýdaky bahasy tas 739 000 dollara barabar.
«Carscoops» neşiriniň ýazmagyna görä, uzynlygy 5480 mm bolan bu dört orunlyk awtomobil iki reňkli kuzowy bilen tapawutlanýar. Hakyky altyn çaýylan bezegler awtomobiliň kapodyna, disklerine, gapdal çyzyklaryna, logotiplerine we yzky tarapdaky ýazgylaryna goýlupdyr. Salonda bolsa üç gatly ekran, agramsyzlyk effektli oturgyçlar, lazer proýektory we 43 sany dinamigi bolan Huawei premium audio ulgamy bar.
Tehniki bölegi Huawei Qiankun ADS 5.0 sürüjä kömek ulgamyny, üçekde ýerleşdirilen 896 çyzykly LiDAR ulgamyny we kuzowyň orta sütünlerindäki goşmaça kameralary öz içine alýar.
Maextro S800 Grand Design modeli üçin iki dürli güýç enjamy saýlap almaga elýeterlidir:
- Doly elektrik görnüşi: umumy kuwwaty 390 kWt (523 at güýji) bolan iki motorly doly çekiji ulgam we 97 kWt·s batareýa bilen üpjün edilýär.
- Ýol ätiýajyny uzaldyjysy bolan görnüş (EREV): generator wezipesini ýerine ýetirýän 1,5 litrlik benzinli turbo hereketlendirijini, üç sany elektromotory we ykjam batareýany (63 kWt·s) özünde birleşdirýär.
Täze model Hytaýyň diler merkezlerine iýun aýynda gelip başlar. Bu model ýurtda bahasy 100 000 dollardan gymmat bolan awtomobilleriň arasynda eýýäm sekiz aý bäri iň köp satylýan ulaglaryň sanawynyň başyny çekýär, umumy üpjünçilik bolsa bolsa 17 müňden geçdi.
