Maserati kompaniýasy soňlugy bilen brendiň logotipine öwrülen meşhur üç dişli nyşanynyň ilkinji gezek ulanylan gününiň 100 ýyllygyna bagyşlanan "GT2 Stradale" superkarynyň ýörite wersiýasyny tanyşdyrdy. Tanyşdyrylyş dabarasy Monsadaky ýaryş wagtynda boldy.
Ýubileý awtoulagy standart "GT2 Stradale" wersiýasyndan diňe korpusynyň reňki bilen tapawutlanýar. Ýöne täze reňkler tertibi markanyň taryhy bilen baglanyşyklydyr. Onuň üçin 1950-nji ýyllarda Huan Manuel Fanho tarapyndan sürlen rowaýaty "Maserati 250F" ýaryş awtoulagynyň daşky görnüşi esas edilip alnypdyr. Ol bu ulagy sürüp, iki gezek çempionlyk derejesini gazandy.
"Maserati 250F-de" Stirling Moss hem ýeňişler gazanypdy, 1958-nji ýylda bolsa Mariýa Tereza de Filippis bu awtoulag bilen Gran-priniň kwalifikasiýasyny ýeňen taryhdaky ilkinji zenan boldy.
Ýubileý "GT2 Stradale-niň" korpusy öň tarapynda sary zolak we ak start nomeri bilen gyzyl reňke boýalypdyr. Yzky direglerinde bolsa üç dişli nyşanyň sary şekilleri ýerleşdirilipdir. "Maserati" bu reňkler tertibiniň modeli satyn alýan müşderiler üçin elýeterli boljakdygyny tassyklady, ýöne bu goşmaça opsiýanyň bahasy we öndüriljek möçberi entek mälim edilmedi.
Şol bir wagtyň özünde kompaniýa meňzeş usulda ýasalan "GT2" ýaryş wersiýasyny hem görkezdi.
"GT2 Stradale" "MC20" modeliniň esasynda gurlup, 2024-nji ýylda ilkinji gezek tanyşdyrylan pursadynda markanyň iň ekstremal ýol awtoulagy hasaplanýardy. Awtoulag ýeňilleşdirilen korpus gurluşyny, kämilleşdirilen aerodinamikany, güýçlendirilen hereketlendirijini we ýaryş ýollarynda ulanmaga gönükdirilen şassi sazlamalaryny aldy.
