Internetde täze “Ferrari Luce” superkary bilen köpçülikleýin öndürilýän üçünji nesil “Nissan Leaf” elektrokarynyň arasynda daşky meňzeşligiň bardygy barada gürrüňler ýaýrap başlandan soň, Nissan kompaniýasy “Ferrari-ä” degsindi.
Ýapon markasynyň Irlandiýadaky edarasy iki ulagyň hem gapdal tarapyny görkezýän surat çap etdi. Onda meňzeş sudur, kontrast gara düşekçe we korpusyň gyralarynyň çyzgylary görkezilýär.
Ulanyjylaryň arasynda "Ferrari täze sahypadan (iňlis dilinde "leaf" — ýaprak/sahypa manysyny berýär) başlamaga synanyşdy" diýen ýaly söz oýnatmalary döräp başlady. “Nissan-yň” wekilleri bu hili degişmeleri goldamakdan çekinmediler — kompaniýa çap edilen deňeşdiriji surata: "Boýun alýarys, bu bizi buýsandyrýar" diýen ýazgy goşuldy.
"Ferrari Luce" atly iň täze elektrik awtoulagy 25-nji maýda tanyşdyryldy. Onuň dizaýnyny "Apple-den" gaýdan Joni Aýw we Mark Nýuson tarapyndan döredilen "LoveFrom" studiýasy işläp düzdi. Model 1050 at güýjüne eýe bolan dört sany elektrik hereketlendirijisini aldy we 100 km/sag tizlik çägine 2,5 sekuntda ýetýär, onuň başlangyç bahasy bolsa 520 müň ýewrodan başlanýar.
Tanyşdyrylyş dabarasyndan dessine soň, "Ferrari-niň" paýnamalary wagtlaýyn 8% (348 dollardan 331 dollara çenli) pese düşdi, ýöne tiz wagtda görkezijiler öňki derejesine gaýdyp geldi we häzirki wagtda paýnama başyna takmynan 340 dollar derejesinde söwda edilýär.
