Demirgazyk Kaliforniýanyň kenarynda ýerli ýaşaýjylar kenara zyňlyp çykan uly, adaty bolmadyk balygy tapdylar. Soňra anyklanyşyna görä, bu adatça Günorta ýarym şarda ýaşaýan seýrek gudwinker güneş balygy (Mola tecta) bolup çykdy. Bu görnüş diňe 2017-nji ýylda resmi taýdan beýan edilipdi diýip, IDR neşiri habar berýär.
Balygy ilkinji bolup ýerli ýaşaýjy Stefan Kisbaý görüpdir. Ilkibaşda ol ony ölen deňiz düwleni diýip pikir edipdir, ýöne balygyň adaty bolmadyk, diýen ýaly tekiz görnüşi onuň ünsüni çekipdir.
“Bu görlüp-eşidilmedik, hyýaly bir zatdy — göýä başga bir planetadan gelen ýaly görünýärdi,” — diýip, Kisbaý öz tapyndysyny suratlandyrdy.
Adamlar balygy gaýtadan ummana goýbermäge synanyşdylar, ýöne ol öldi.
Identifikasiýany bu görnüşi ilkinji gezek suratlandyran alym doktor Marianna Nýugor geçirdi. Ol suratlaryň esasynda balygyň hakykatdanam dünýädäki iň agyr süňkli balyklaryň biri bolan Mola tecta-dygyny tassyklady. Onuň agramy iki tonnadan gowrak bolup, uzynlygy 2,7 metre çenli ýetýär.
Alymlar bu görnüşiň demirgazyk suwlarynda seýrek duş gelýändigini belleýärler. Şonuň üçin Kaliforniýada peýda bolmagy onuň ýaşaýan meýdany we göçüş ýoly baradaky öňki maglumatlara gabat gelmeýär. Bu waka ylmy jemgyýetde uly gyzyklanma döretdi — häzirki wagtda Dewisdäki Kaliforniýa uniwersitetiniň ýanyndaky Bodega deňiz laboratoriýasy genetiki derňew geçirmek üçin balygyň dokuma nusgalaryny barlaýar.
Wakadan soň Sonoma County Regional Parks guramasynyň wekilleri ilaty kenara çykyp galan deňiz haýwanlaryna ýakynlaşmazlyga hem-de olary özbaşdak halas etmäge synanyşmazlyga çagyrdylar. Şeýle ýagdaý ýüze çykan halatynda diňe hünärmenlere habar bermek maslahat berilýär.
