Türkmenistanyň Halk Maslahatynyň Başlygy Gurbanguly Berdimuhamedow Amerikanyň Birleşen Ştatlarynyň Türkmenistan – Owganystan – Pakistan – Hindistan gaz geçiriji taslamasyny ilkinji bolup goldan döwletleriň biridigini belledi. Bu barada türkmen halkynyň Milli Lideri «Arkadagyň Ak ýoly bilen Serhetabat – Hyrat» gaz geçirijisiniň nobatdaky tapgyrynyň gurluşygyna badalga bermek dabarasynda eden çykyşynda aýtdy.
Gurbanguly Berdimuhamedow Amerikanyň «Brownstein» kompaniýasynyň TOPH gaz geçiriji taslamasynyň konsultant-maslahatçysy bolup çykyş edýändigini belläp, bu kompaniýanyň goşandyny aýratyn belläp geçdi.
“Brownstein” kompaniýasy bu ägirt uly taslamany durmuşa geçirmekde öz gymmatly, peýdaly maslahatlaryny berýär” diýip, Gurbanguly Berdimuhamedow aýtdy.
Şeýle hem türkmen halkynyň Milli Lideri Garaşsyzlyk ýyllary içinde Türkmenistan bilen ABŞ-nyň arasyndaky gatnaşyklaryň ýokary derejede ösdürilýändigigi belledi.
Häzirki wagtda ikitaraplaýyn hyzmatdaşlyk köp sanly ugurlary öz içine alýar. Bu ugurlara özara söwda, maýa goýumlary hem-de işewürler toparlarynyň arasyndaky gatnaşyklar degişlidir.
Şunuň bilen baglylykda, Türkmen-amerikan işewürler geňeşiniň uly ähmiýetiniň bardygy aýratyn bellenilip geçildi.
Türkmen halkynyň Milli Lideri köp ýyllardan bäri belli amerikan kompaniýalary Türkmenistanda uly işleri durmuşa geçirýändigini belledi.
Ýurdumyzda üstünlikli iş alyp barýan kompaniýalaryň hatarynda Amerikanyň «Boeing», «Case New Holland», «John Deere», «Caterpillar», «General Electriс», «Sikorsky», «Nicklaus Design» kompaniýalary agzalyp geçildi.
Türkmen halkynyň Milli Lideri pursatdan peýdalanyp, ýurdumyzda geçirilýän uly ähmiýetli halkara maslahatlary goldap, öz gutlagyny iberendigi, şeýle hem «Türkmenistan–Owganystan–Pakistan–Hindistan» gaz geçiriji taslamasyny goldaýandygy üçin Amerikanyň Birleşen Ştatlarynyň Prezidenti Donald Trampa tüýs ýürekden minnetdarlyk bildirdi.
