Ýakynda Nýu-Ýorkdaky Park-awenýuda gurlan 102 gatly ýaşaýyş jaýy ýumrulmak howpunyň astynda düşdi. The New York Times-yň maglumatlaryna görä, munuň güman edilýän sebäbi gurluşykda ulanylan betonyň düzüminiň üýtgedilmegi boldy. Eger bina dikeldiş işlerini geçmese, ol ýaşamak üçin amatsyz we ötegçiler üçin howply bolar.
Ýaşaýjylar diwarlarda jaýryklaryň bardygy, potolokdan suw syzýandygy we liftleriň yzygiderli döwülýändigi barada habar berýär. Kazyýet resminamalaryndan we ýaşaýjylar bilen jaý gurujylaryň arasyndaky hatlardan ugur alsaň, meseleleriň ýüze çykmagynda ak fasadyň möhüm rol oýnandygy görünýär.
NYT-yň belleýşi ýaly, beton, adatça, sementdäki demir oksidleri sebäpli çal reňke eýe bolýar. Komponentleriň düzüminiň üýtgemegi onuň berkligine, reňkine we ulanylyş aýratynlyklaryna täsir edip bilýär.
Ýaşaýjylar bu meseleden 2017-nji ýylda zeýrenip başlady. 2021-nji ýylda olar ilkinji şikaýat arzasyny berip, 165 mln dollar möçberde öwez tölegini talap etdi.
Park-awenýu, 432 salgysy boýunça ýerleşýän bu bina dünýäde iň beýik ýaşaýyş binasy hökmünde göz öňünde tutulyp, millionerleriň köçesiniň “dürdänesi” hasaplanýardy. Binanyň belli ýaşaýjylarynyň arasynda maliýeçi Lýuis Sanders we saud milliarderi Fawaz Al-Hokaýr bar.
