ABŞ-nyň Adalat ministrligi Paramount Skydance kompaniýasy tarapyndan Warner Bros. Discovery-ny satyn almak boýunça 111 milliard dollarlyk şertnamany makullady.
Düzgünleşdiriji striming platformalarynyň, telewideniýäniň we kino önümçiliginiň bazarlarynda bäsdeşlik üçin hiç hili howpy ýüze çykarmandygyny habar berdi. Şol bir wagtyň özünde, rugsat almak üçin kompaniýadan Warner Bros. Discovery-nyň käbir aktiwlerinden ýüz öwürmek talap edilmedi.
Şertnamanyň düzümine kinostudiýalar, meşhur franşizalar üçin hukuklar, HBO striming hyzmaty we Warner Bros. Games oýun bölümçesi girýär.
Paramount kompaniýasy şertnamany resmileşdirmek işlerini sentýabr aýynyň ahyryna çenli tamamlamagy göz öňünde tutýandygyny mälim etdi.
«Şertnamany düýpli barlan Adalat ministrligine, şeýle hem öz barlaglaryny tamamlap, häzirki wagtda rugsat beren beýleki edaralaryň işine minnetdarlyk bildirýäris. Bu şertnama bäsdeşlige ýardam edýär, munuň netijesinde kompaniýa has güýçlener we pudakda agalyk edýän tehnologiýa platformalary bilen bäsleşmek üçin has gowy mümkinçiliklere eýe bolar. Biz häzirem şertnamany çalt tamamlamaga hem-de onuň artykmaçlyklaryny sarp edijilere, kontent döredijilere we umuman dynç alyş-güýmenje pudagyna ýetirmäge ünsümizi gönükdirýäris» – diýlip, kompaniýanyň beýanatynda aýdylýar.
Şeýle-de bolsa, bu amal entek doly tamamlanmady. Birnäçe ştatlarda, şol sanda Kaliforniýada we Nýu-Ýorkda häkimiýetler bu birleşmä garşy çykyp, antimonopoliýa şikaýatlaryny taýýarlaýar.
