“Oskar” baýragynyň guramaçylary baýraga dalaşgärleriň yglan ediljek senesini ikinji gezek üýtgetdi. Variety neşiriniň maglumatlaryna görä, dalaşgärleriň sanawy 23-nji ýanwarda onlaýn görnüşde yglan ediler. Çäräniň başlanjak senesi Ýuwaş umman wagty boýunça 5:30-a (Aşgabat wagty bilen 20:30) meýilleşdirilýär.
Kinematografiýa sungaty we ylymlar akademiýasynyň prezidenti Bill Kramer ses beriş möhletiniň hem 17-nji ýanwara çenli uzaldylandygyny habar berdi.
Ilkibaşda dalaşgärler 17-nji ýanwarda yglan edilmelidi, ýöne Los-Anjelesdäki ýangynlar sebäpli sene 19-njy ýanwara geçirildi. 7-nji ýanwarda Pasifik-Paliseýdsde başlanan we Malibu, Santa-Monika şäherlerine ýaýran ýangyn Kaliforniýanyň taryhynda iň weýrançylykly hadysalaryň biri boldy. Müňlerçe desga ýumruldy, 200 müň töweregi adam ewakuasiýa edildi, 24 adam ýogaldy.
Şeýle-de, 10-njy fewrala meýilleşdirilen “Oskar” baýragyna dalaşgärleriň her ýylky dabaraly naharyny geçirmekden hem ýüz öwrüldi. Mundan başga-da, 18-nji fewralda geçirilmeli bolan ylym we tehniki baýraklaryň gowşurylyşy näbelli möhlet bilen yza süýşürildi.
Belläp geçsek, kino baýragynyň gowşurylyş dabarasy öňki senesinde galdy: ol 2-nji martda Los-Anjelesdäki Dolby teatrynda geçiriler. Alypbaryjy Konan O’Braýen bolar.
