Hytaýly alymlar, takmynan, 800 müň – 1,1 mln ýyl mundan ozal ýaşap geçen gadymy adamlaryň ýüzüni gaýtadan döretmegi başardylar.
Daşa öwrülip giden kelleçanaklar gominidleriň erkegine we aýalyna degişli. Derňew olaryň 25 – 45 ýaş aralygynda ölendigini görkezdi. Olaryň galyndylary geçen asyryň 80-nji ýyllarynyň ahyrynda Hubeý welaýatynda tapyldy. Paleoantropolog Szýa Lanpo olara tapylan ýeriniň hormatyna ýunsýan adamy diýip at dakdy.
Adamlaryň bu gadymy nesliniň ýüz keşbini dikeltmek Hytaýyň birnäçe uniwersitetleriniň we institutlarynyň alymlarynyň yhlasly işiniň netijesinde başa bardy. Hünärmenler häzirkizaman modelirleme usullarynyň kömegi bilen ýüzüň sypatyny, kelleçanagyň şekilini we beýleki anatomiki aýratynlyklary kesgitlediler.
Ýunsýan adamynyň gaýtadan dikeldilen ýüzi indi Hubeý welaýatynyň muzeýinde köpçülige görkezilýär.
