Google "Gemini Live" wirtual kömekçisini Windows operasion ulgamynyň wezipeler sanawyna goşmagyň üstünde işleýär. Munuň özi ulanyjylaryň emeli aňyň tekst döretmek, terjime we maglumat gözlegi ýaly funksiýalaryna gönüden-göni wezipeler panelinden girip biljekdigini aňladýar diýip, TechRadar habar berýär.
Ozal Gemini Live diňe ykjam programmada bardy. Şeýle-de bolsa, täze Chromium patçynyň kömegi bilen Google bu funksiýany Windows 11, Windows 10 we beýleki platformalar üçin Chrome brauzerine birleşdirmegi meýilleşdirýär. Bu Edge-däki Microsoft Copilot gapdal panelini ýada salýan has amatly ulanyjy interfeýsini döretmäge mümkinçilik berer.
Gemini Live-yň täzeden ornaşdyrylmagynyň esasy aýratynlyklaryndan biri “ýüzýän panel” diýlip atlandyrylar. Bu wirtual kömekçili penjiräniň brauzer penjiresine bagly bolman, beýleki penjireleriň üstünde ýerleşdirilip bilinjekdigini aňladýar. Ulanyjylar islendik wagt wezipeler panelindäki degişli nyşana basyp, Gemini Live-y çagyryp bilerler.
Şeýle-de bolsa, emeli aň ýaly güýçli funksiýany operasiýa ulgamyna goşmak käbir kynçylyklaryň ýüze çykmagyna sebäp bolup biler. Birinjiden, bu ulgamyň işleýşine, esasanam güýji pes kompýuterlere ýaramaz täsir edip biler. Ikinjiden, ulanyjylaryň maglumatlarynyň gizlinligi meselesi ýüze çykýar. Google, maglumatlaryň syzmagynyň öňüni almak üçin, ulanyjy maglumatlaryny gorajak güýçli mehanizmleri işläp düzmeli bolar.
