Londonyň Uniwersitet kollejiniň alymlary yzygiderli bir guty çilim çekýän çilimkeşiň ömrüniň näçe sagadyny ýitirýändigini hasaplamak kararyna geldiler. The Guardian neşiriniň ýazmagyna görä, her gün bir guty çilim ömri ýedi sagat gysgaldýar eken.
UCL-iň alkogol we temmäki boýunça gözleg toparynyň baş ylmy işgäri doktor Sara Jekson nikotiniň eýýäm orta ýaşda saglyga zyýanly täsiri ýetirip başlaýandygyny düşündirdi.
“60 ýaşly çilimkeş 70 ýaşly çilim çekmeýän adamyň saglyk ýagdaýyna eýe bolar” – diýip, ol belledi.
Gözlegiň awtorlary çilim çekmekden ýüz öwürmegiň çaklamany ep-esli gowulaşdyryp biljekdigini belläp geçdiler. Seljermä laýyklykda, eger her gün 10 çilim çekýän çilimkeş bu endigini ýylyň başynda taşlan bolsa, bir hepdäniň dowamynda ömrüniň tutuş bir gününiň ýitmeginiň öňüni alyp biler. Eger çilim çekmegini 5-nji fewrala çenli taşlasa, onda ömür dowamlylygyny bir hepde, eger 5-nji awgusta çenli taşlasa, tutuş bir aý uzaldyp biler.
“Belli bolşy ýaly, adamlar çilim çekmegiň zyýanlydygyny bilýärler, ýöne näderejededigine doly baha berip bilenoklar. Ortaça hasap bilen, çilim çekmegini taşlamaýan çilimkeş ömrüniň, takmynan, 10 ýylyny ýitirýär. Bu 10 ýyl gymmatly wagt, durmuş pursatlary we ýakynlaryň bilen duşuşyklar” – diýip, Sara Jekson belledi.
