4-nji ýanwarda Türkmenistanyň Daşary işler ministrliginiň Halkara gatnaşyklary institutynda Prezident Serdar Berdimuhamedowyň “Magtymguly – dünýäniň akyldary” atly täze kitabynyň tanyşdyrylyş dabarasy geçirildi. Bu barada Türkmenistanyň DIM-niň metbugat gullugy habar berýär.
Tanyşdyryş dabarasynda Türkmenistanyň DIM-niň Halkara gatnaşyklary institutynyň rektory Gülşat Ýusupowa, wise-premýer, daşary işler ministri Raşid Meredow, Gyrgyz Respublikasynyň ilçisi Azizbek Madmarow, Täjigistanyň ilçisi Wafo Alibek Niýatbekzoda, Hindistanyň ilçisi Madhumita Hazarika Bhagat, Özbegistanyň ilçisi Rawşanbek Alimow, ÝHHG-niň Aşgabatdaky merkeziniň ýolbaşçysy Jon MakGregor, şeýle-de Türkmenistanyň ylym we bilim işgärleri çykyş etdiler.
Çykyşlarda Türkmenistanyň Prezidentiniň görnükli söz ussadynyň mirasynyň, onuň dünýä edebiýatyna goşan goşandynyň, şahyryň ýubileýi mynasybetli guralan çäreleriň giňden beýan edilýän “Magtymguly – dünýäniň akyldary” atly täze kitabynyň çapdan çykmagynyň ähmiýeti bellenildi.
Nygtalyşy ýaly, kitap owadan fotosuratlar bilen bezelip, ýokary çaphana usulynda, üç dilde – türkmen, rus we iňlis dilleriniň hersinde aýratyn kitap görnüşinde çap edildi. Sekiz bölümden ybarat bolan neşir giň okyjylar köpçüligine, ylmyň we çeper edebiýatyň muşdaklaryna, Magtymgulynyň döredijilik mirasyny öwrenijilere niýetlenendir.
