Birleşen Arap Emirlikleri 2025-nji ýyla birnäçe dünýä rekordyny goýan giň gerimli baýramçylyk çäreleri bilen başlady.
2025-nji ýylyň gelmegi tutuş ýurt boýunça 60 meýdançada baýramçylyk feýerwerkleri we pirotehniki şüweleň bilen baýram edildi diýip, Khaleej Times habar berýär.
Iň uzak dowam eden feýerwerk Abu-Dabide şeýh Zaýediň festiwalynda ýaňlandy – feýerwerk 53 minut dowam etdi. Şeýle-de, tomaşaçylary 10 müň dronyň gatnaşmagyndaky çykyş haýran galdyrdy. Asmana 100 müň howa şary uçuryldy. Guramaçylar birbada alty dünýä rekordyny gazanmagy maksat edindiler.
Ras-Al-Haýmda sebitiň medeniýetine bagyşlanan Our Story in the Sky şüweleňiniň netijesinde Ginnesiň iki rekordy goýuldy. 1400 dronyň kömegi bilen agaç we deňiz balykgulagy görnüşinde dünýäde iň uly şekiller döredildi. Çykyş üç bölekden ybarat boldy: birinji bölek Ras-Al-Haýmyň ekoulgamyna, ikinjisi – deňiz mirasyna we dür almaga, üçünjisi – deňizde ýüzmek däplerine bagyşlandy. Baýramçylyk ajaýyp feýerwerk bilen tamamlandy.
Dubaý hem, adat bolşy ýaly, onlarça müň tomaşaçyny Burj Halifa diňine çekdi. Binanyň fasadynda köp sanly wizual effektler bilen pirotehniki şüweleň görkezildi. Mundan başga-da, Global Village seýilgähinde Täze ýyly ýedi gezek feýerwerk bilen garşyladylar. Bu seýilgähiň köp medeniýetli üýtgeşikligini görkezmäge mümkinçilik berdi.
BAE-de Täze ýylyň baýram edilmegi diňe bir tomaşaçylary haýran galdyrman, eýsem ýurduň giň gerimli çäreleri guramakda öňdebaryjylaryň biri statusyny tassyklady.
