Birleşen Arap Emirlikleriniň (BAE) Hökümeti kämillik ýaşyna ýetmedikleriň sosial ulgamlaryny ulanmagyny düýpgöter çäklendirýän karary tassyklady. «Khaleej Times» neşiriniň habar bermegine görä, mundan beýläk 15 ýaşy dolmadyk çagalara şahsy akkauntlary açmak, sosial platformalardan peýdalanmak we olaryň mümkinçiliklerine girmek dolulygyna gadagan edilýär.
Bu çäklendirme gutarnykly bolup, hatda ene-atalaryň resmi razylygy bolan ýagdaýynda-da çagalaryň bu serwislere girmegine rugsat berilmeýär.
15-den 16 ýaşa çenli bolan ýaş topary üçin sosial ulgamlaryny ulanmak mümkinçiligi saklanyp galýar, ýöne olaryň bu ýerdäki işjeňligi berk gözegçilik astynda bolar. Internet platformalarynyň ýolbaşçylary gorag çäreleriniň toplumyny girizmäge borçludyr:
- Neşir edilýän materiallaryň ýaş aýratynlyklary boýunça hökmany bölünmegini;
- Psihiki saglyk üçin howply bolup biljek funksiýalaryň bloklanmagyny;
- Programmada geçirilýän wagty gözegçilikde saklaýan gurallary;
- Ene-ata gözegçiligi üçin goşmaça giňeldilen sazlamalary.
Sosial torlaryna döwlet edaralarynyň gözegçiligi astynda içki algoritmleri uýgunlaşdyrmak we ulanyjylaryň ýaşyny anyklaýan gurallary ornaşdyrmak üçin dogry bir ýyl wagt berildi.
Häkimiýetleriň bu çözgüdi 2024-nji ýylda geçirilen giň göwrümli barlagyň netijelerine esaslanýar. Toplanan statistiki maglumatlara görä, BAE-niň kämillik ýaşyna ýetmedik ýaşaýjylary sosial platformalarda her gün ortaça üç sagada golaý wagt geçirýär.
Lukmançylyk hünärmenleri muňa uly alada bildirýär: şeýle sanly garaşlylyk çagalarda hroniki howsala duýgusynyň ösmegine sebäp bolýar, ünsüň jemlenmeginiň birden peselmegine, okuwa ýetişigiň gowşamagyna, irki ýaşlarda bolsa gepläp başlamagyň gijikmegine alyp barýar.
Hünärmenler sosial ulgamlaryň algoritmleriniň (üznüksiz lenta, laýklar, bildirişler we teswirler) beýnidäki lezzet merkezlerini emeli usulda oýandyrýandygyny we dofaminiň güýçli bölünip çykmagyna sebäp bolýandygyny aýdýar. Bu bolsa çagalaryň psihikasyny goragsyz galdyrýar we ýaşlary yzygiderli smartfon ekranlaryna seretmäge mejbur edýär.
Bu kanuny kabul etmek bilen BAE platformalaryň çagalara ýetirýän täsirine garşy kanunçylyk derejesinde ulgamlaýyn göreşýän döwletleriň hataryna goşuldy. Mundan ozal Awstraliýa, Beýik Britaniýa we Malaýziýa hem şeýle ýaş çäklendirmelerini girizip başlapdy.
