Birleşen Arap Emirliklerinde 2026-njy ýylyň 30-njy iýunyndan başlap, ilkinji gezek yzygiderli ýolagçy otly gatnawlary hereket edip başlar. Etihad Rail ýolagçy liniýasynyň açylmagy ýurduň ähli ýedi emirligini özara birleşdirjek demirýol ulgamyny döretmegiň ilkinji tapgyry bolar.
Ilkinji tapgyrda otlular Abu-Dabi we Fujeýra şäherleriniň arasynda gatnar. Ýoldaky wagt 1 sagat 45 minuta deň bolar. Petekleriň bahasy «Komfort» klasda 55 dirhamdan (takmynan, 14,85 dollar), «Premium» klasda bolsa 120 dirhamdan (takmynan, 32,40 dollar) başlanýar.
30-njy sentýabrdan Dubaý — Al-Dhaýd ugruny açmak, 30-njy dekabrda Al-Dafradaky stansiýalary işe girizmek, 2027-nji ýylyň 30-njy martyndan bolsa Şarja emirligindäki stansiýalary açmak meýilleşdirilýär. Demirýol ulgamyny doly güýjünde ulanmaga bermek işleri bolsa 2028-nji ýyla çenli tamamlanar.
Uzynlygy 900 kilometre ýetýän demirýol liniýasy 11 sany şäheri özara birleşdirer. Otlular tizligini sagatda 200 km çenli artdyryp biler we bir gezekde 400 ýolagçyny gatnadyp biler. Wagonlarda işlemek we dynç almak üçin ýörite zolaklar, göwün açyjy ulgamlar, zarýad beriji enjamlar, iýmit we sowadyş ulgamlary göz öňünde tutuldy.
Etihad Rail kompaniýasy 2009-njy ýylda döredildi. Demir ýoluň birinji tapgyry 2016-njy ýylda, ikinji tapgyry bolsa 2023-nji ýylda işe girizildi. Häzire çenli bu infrastruktura diňe ýük daşamak maksatlary üçin ulanylypdy.
