25-nji dekabrda Türkmenistanyň Daşary işler ministrliginiň Halkara gatnaşyklary institutynda Magtymguly Pyragynyň saýlanan eserleriniň hytaý dilindäki ýygyndysynyň tanyşdyrylyş dabarasy geçirildi.
Türkmenistanyň DIM-niň metbugat gullugynyň habar bermegine görä, çärä ýurdumyzyň daşary syýasat edarasynyň, Türkmenistanda işleýän diplomatik wekilhanalarynyň we halkara guramalarynyň wekilhanalarynyň ýolbaşçylary hem-de wekilleri, Türkmenistanyň daşary ýurtlardaky diplomatik wekilhanalarynyň we konsullyk edaralarynyň ýolbaşçylary, institutyň professor-mugallymlary we talyplary, şeýle-de KHBS-iň wekilleri gatnaşdylar.
Dabarada Halkara gatnaşyklary institutynyň rektory Gülşat Ýusupowa, Hytaýyň Türkmenistandaky ilçisi Sýan Naýçen, Türkmenistanyň Hytaýdaky ilçisi Parahat Durdyýew, şeýle hem institutyň mugallymlary çykyş etdiler. Şeýle-de çäräniň barşynda Hytaýyň ylmy we jemgyýetçilik işgärleriniň wideoaragatnaşyk arkaly çykyşlary diňlenildi.
Dabara gatnaşyjylaryň nygtaýşy ýaly, ýüzýyllyklaryň geçendigine garamazdan, Magtymgulynyň eserleri täze röwüşde ýaňlanýar we Türkmenistanyň çäklerinden has uzaklarda-da barha meşhurlyga eýe bolýar. Akyldar şahyryň goşgulary Watana söýginiň, ynsanperwerligiň, parahatçylygyň, dost-doganlygyň, raýdaşlygyň, dürli medeniýetleriň we halklaryň arasynda özara ynanyşmagyň, hormat goýmagyň çagyryşy bolup çykyş edýär.
