Günorta koreýaly alymlar ysmaz bolan adamlara hereket etmäge kömek edýän, ýeňil geýilýän WalkON Suit F1 robotyny öndürdiler diýip, Reuters habar berýär.
Işläp düzüjileriň biri Kim Syn Hwanyň özi paraplegiýadan (elleriň ýa-da aýaklaryň ikisini hem hereketden goýýan ysmazyň bir görnüşi) ejir çekýär. Ol Koreýanyň öňdebaryjy ylym we tehnologiýalar institutynyň (KAIST) Ekzoskeletler laboratoriýasynyň toparynyň düzümine girýär.
Alymyň sözlerine görä, kostýum ysmazly adamlara sagatda 3,2 km tizlik bilen ýöremäge, basgançaklara çykmaga we gapdala ädim ätmäge mümkinçilik berýär.
“Ol nirede bolsam-da, hatda maýyplaryň arabasynda otyrkam hem meniň ýanyma gelip, ýerimden turmaga kömek edip biler. Bu onuň tapawutly aýratynlyklaryndan biridir " - diýip, Kim gürrüň berýär.
Kostýumyň agramy 50 kg hem-de alýuminden we titandan ýasalan. Hereket bogunlaryň işleýşini simulasiýa edýän 12 sany elektrik hereketlendirijisi arkaly üpjün edilýär. Deňagramlylygy saklamak üçin robot sekuntda 1000-e çenli signaly işlemäge ukyply datçikleri ulanýar.
Işläp düzüjiler "Demir adam" filminden ylham aldylar.
"Hakyky durmuşda adamlara kömek edýän robotlar döredilse gaty gowy bolardy diýip pikir edipdim" – diýip, inžener Park Çon Su pikirini paýlaşýar.
Ekzoskeletdäki linzalar göz ýaly hereket edýär, daşky gurşawy seljerýär we ulanyja päsgelçilikleri ýeňip geçmäge kömek edýär.
