Türkmen oba hojalyk instituty 2024-nji ýylda “UI GreenMetricWorld University Ranking” atly uniwersitetleriň reýtinginde 726-njy orunda hasaba alyndy. Reýtingde ýokary okuw jaýlarynyň daşky gurşawy goramak, energiýa, howanyň üýtgemegi, galyndylary dolandyrmak, ulag we durnuklylyk boýunça bitirýän işleri bahalandyrylýar. Bu ýyl bu reýtinge dünýäniň 95 döwletinden 1477 sany ýokary okuw mekdepleri gatnaşdylar. Bu barada ýokary okuw mekdebiniň saýtynda habar berilýär.
“UI GreenMetricWorld University Ranking” halkara uniwersitetleriň reýtingi durnukly ösüşiň maksatlaryna daýanýan birnäçe görkezijiler boýunça bahalandyrylýar. Daşoguz welaýatyndaky Türkmen oba hojalyk instituty howanyň üýtgemegi, energiýa, galyndylar, suw, ulag, ylym we gözleg ýaly ugurlar boýunça netijeli işleri alyp barýar. Institutyň mugallymlary, işgärleri taýýarlaýan ylmy makalalarynyň, ylmy işleriniň üsti bilen reýtingde ýokary netijeleri gazanmaga öz mynasyp goşantlaryny goşdular.
Belläp geçsek, bu halkara reýtinge Türkmenistandan jemi 11 sany ýokary okuw mekdebi hasaba alyndy.
