10-njy dekabrda Prezident Serdar Berdimuhamedowyň tabşyrygy boýunça Mejlisiň Başlygy D.Gulmanowa Belgiýa Patyşalygynyň Türkmenistanda täze bellenen Adatdan daşary we Doly ygtyýarly ilçisi Žýulen de Fraýpondan ynanç hatyny kabul etdi.
Netijeli ýagdaýda geçen duşuşygyň dowamynda ilçi döwletimiziň alyp barýan içeri we daşary syýasatynyň ileri tutulýan ugurlary bilen giňişleýin tanyşdyryldy. Milli parlamentiň ýolbaşçysy ýurdumyzda alnyp barylýan giň gerimli özgertmelere daşary ýurtly hyzmatdaşlaryň gyzyklanmalaryny göz öňünde tutup, durmuşa geçirilýän giň gerimli işleriň esasy maksatlary we wezipeleri barada gürrüň berdi. Söhbetdeşligiň dowamynda ikitaraplaýyn we köptaraplaýyn esasda, iri halkara guramalaryň çäklerinde üstünlikli alnyp barylýan döwletara hyzmatdaşlygyň möhüm ugurlary barada pikir alşyldy.
Türkmen-belgiýa parlamentara gatnaşyklaryny işjeňleşdirmegiň mümkinçilikleri maslahatlaşmalaryň aýratyn meselesi boldy. Bellenilişi ýaly, bu gatnaşyklaryň giňeldilmegi syýasy-diplomatik, söwda-ykdysady, medeni-ynsanperwer dialogyň işjeňleşdirilmegine ýardam eder.
Şol gün ilçi Žýulen de Fraýpon şeýle hem Türkmenistanyň DIM-nde daşary işler ministriniň orunbasary Ahmet Gurbanow bilen duşuşdy.
Ilçi diplomatik işini Baku şäherinde oturýan ýerinden alyp barar.
