Google DeepMind täze emeli aň modeli bolan GenCast-y işläp düzdi. Bu model 15 güne çenli howa maglumatlaryny ýokary takyklyk bilen çaklap bilýär.
Modeliň howanyň şertlerini çaklamak prosesi bary-ýogy 8 minut dowam edýär, emma adaty usullarda munuň üçin has köp wagt we has köp hasaplamalary geçirmek gerek bolýar. Ylmy barlaglar GenCast-yň howanyň şertlerini 97% takyklyk bilen öňünden aýdyp bilýändigini, hususan-da güýçli harasat, ýylylyk tolkunlary we tropik siklon ýaly adatdan daşary ýagdaýlary çaklamakda ýokary netijeleri berýändigini görkezdi, diýip "Nature" žurnaly habar berýär.
GenCast guraly 1979-2018 ýyllar aralygyndaky howa maglumatlaryna esaslanýar.
Şeýle hem täze model «diffuziýa» usulyny ulanýar. Bu usul maşyn öwrenişinde ulanylýan usul bolup, bar bolan maglumatlara tötänleýin ses goşýar we modeliň ygtybarlylygyny ýokarlandyrýar.
Google DeepMind-dan Ilan Praýsyň aýtmagyna görä, GenCast ylmy jemgyýet üçin elýeterli bolar we çylşyrymly meteorologiki proseslere has gowy düşünmäge kömek eder. GenCast-da maglumatlaryň açyk we elýeterli bolmagy adatdan daşary howa hadysalaryny öwrenmäge we olara taýýarlyk görmäge kömek edýär.
Adatdan daşary howa ýagdaýlarynyň ýakynlaşmagy baradaky çaklamalar, bu howa şertlerine köp sezewar bolýan sebitlerde ýaşaýan adamlara tebigy betbagtçylyklara has gowy taýýarlanmaga mümkinçilik berýär.
