“SpaceX” kompaniýasy gaýtadan ulanylýan “Falcon 9” raketasy bilen täze rekord goýmagyny dowam etdirýär. Geçen hepde kompaniýa raketanyň 400-nji uçuryşyny üstünlikli tamamlady.
“Falcon” programmasynyň bir bölegi hökmünde kosmos gämilerini daşaýjynyň 375-nji gaýdyp gelişi hasaba alyndy. Şeýle-de onuň gonuş bilen uçuş aralygyndaky wagty üçin hem täze rekord gazanyldy. Ol wagt bary-ýogy 13 gün 12 sagada deň boldy.
Noýabr aýynda “SpaceX” 16 sany raketa uçuryşyny amala aşyrdy, bu bolsa kompaniýa üçin rekord görkezijidir. “SpaceX-iň" wise-prezidenti Kiko Donçew dekabr aýynda ýene 15 uçuryşyň meýilleşdirilýändigini aýtdy diýip, ixbt.com ýazýar.
Bu ýyl kompaniýa ozalky rekordyndan hem öňe geçdi, ol 2023-nji ýylda 92 uçuryşy amala aşyrypdy. “SpaceX” ýylyň ahyryna çenli ýene iki sany “Falcon Heavy” missiýasyny goşmak bilen, uçuryş sanawyny 136-a ýetirip biler.
“Falcon 9” bir ýylda "NASA Space Shuttle-iň" 30 ýyldakysyndan (135) has köp tabşyrygy ýerine ýetirip biler.
Şeýle-de “Falcon 9-yň" bir uçurylyşynyň bahasy 15 million dollardyr. Bu bolsa “Space Shuttle-iň" uçuryşyndan 100 esse arzan bolýar. Onuň uçuryş bahasy takmynan 1,5 milliard dollar diýip, arstechnica.com habar berýär.
