Accelera H2Rescue wodorod ýangyç elementli ýük ulagy goşmaça ýangyç guýulmazdan 2906 kilometr ýol geçip, täze dünýä rekordyny goýdy. Ulag 18-nji oktýabrda ýola düşüp, syýahatyny 25-nji noýabrda Kaliforniýada tamamlady.
Ginnesiň rekordlar kitabynyň synçylary 175 kilogram wodorod guýlan ýük ulagynyň ýangyç bagyny ugramazyndan ozal möhürlediler. 250 kWt kuwwatly hereketlendirijisi bolan awtoulag sagatda ortaça 80-90 kilometr bilen hereket etdi. Ýedi günde 168 kilogram wodorod sarp etdi, ýekeje gram hem kömürturşy gazyny çykarmady.
H2Rescue programmasynyň tehniki ýolbaşçysy Pratik Waýş bu taslamany nol zyňyndyly ulaglaryň ösüşinde möhüm ädim diýip atlandyrdy. Onuň sözlerine görä, wodorod ýangyç hökmünde öz artykmaçlyklaryny görkezdi, ýagny sesi örän pes we zyýanly zyňyndylary ýok. Ýeke-täk “kemçiligi” - suw we bug çykarýar.
Waýşyň pikirine görä, bu rekord ulag pudagynda, esasanam, uzak aralyga ýük daşamakda wodorody ulanmagyň geljeginiň bardygyny tassyklaýar.
