25-nji noýabrda Türkmenistanyň Halk Maslahatynyň Başlygy Gurbanguly Berdimuhamedow Türki Döwletleriň Guramasynyň Aksakgallar geňeşiniň başlygy Binali Ýyldyrym bilen telefon arkaly söhbetdeş boldy. TDH-nyň habar bermegine görä, Binali Ýyldyrym Gurbanguly Berdimuhamedowy Wengriýanyň paýtagty Budapeştde geçiriljek Aksakgallar geňeşiniň 16-njy mejlisine gatnaşmaga çagyrdy.
Türki Döwletleriň Guramasynyň Aksakgallar geňeşiniň başlygy Türkmenistanyň Halk Maslahatynyň Başlygyny Budapeştde geçiriljek mejlise geňeşiň agzasy, şeýle hem hormatly myhman hökmünde gatnaşmaga çagyrdy we Türkiýe Respublikasynyň Prezidenti Rejep Taýyp Ärdoganyň mähirli salamyny ýetirdi.
Türkmen halkynyň Milli Lideri çakylyk üçin minnetdarlyk bildirip, doganlyk ýurduň Baştutanyna salamyny, iň gowy arzuwlaryny beýan etdi.
Söhbetdeşligiň dowamynda nygtalyşy ýaly, türki döwletler bilen ikitaraplaýyn we köptaraplaýyn hyzmatdaşlygy ösdürmek ýurdumyzyň daşary syýasat strategiýasynda möhüm orny eýeleýär.
Türkmen halkynyň Milli Lideri Türkmenistan bilen Türkiýe Respublikasynyň, Türki Döwletleriň Guramasynyň arasyndaky gatnaşyklary ösdürmäge we has-da pugtalandyrmaga gönükdirilen başlangyçlary goldamaga taýýardygyny tassyklap, Binali Ýyldyrymy şu ýylyň 12-nji dekabrynda Halkara Bitaraplyk güni mynasybetli Aşgabatda geçiriljek baýramçylyk çärelerine gatnaşmaga çagyrdy.
