Özbegistanyň paýtagtynda Merkezi Aziýa ýurtlarynyň söwdany ýeňilleşdirmek boýunça milli komitetleriniň 12-nji sebitleýin ýygnagy geçirildi. Bu çäre Germaniýanyň Halkara Hyzmatdaşlyk Jemgyýeti (GIZ) tarapyndan Germaniýanyň Federal Ykdysady Hyzmatdaşlyk we Ösüş ministrliginiň adyndan ýerine ýetirilen taslamanyň çäginde gurnaldy diýip, "Neýtralnyý Türkmenistan" ýazýar.
Duşuşyga Gazagystanyň, Gyrgyzystanyň, Täjigistanyň, Türkmenistanyň we Özbegistanyň wekilleri gatnaşdy.
Türkmen tarapyndan Türkmenistanyň Söwda we daşary ykdysady gatnaşyklar ministrliginiň, Ministrler Kabinetiniň ýanyndaky Ulag we kommunikasiýalar agentliginiň, Döwlet gümrük gullugynyň, Döwlet ösümlik karantin gullugynyň, Türkmen Logistika Assosiasiýasynyň we Halkara Türkmen Assosiasiýasynyň hünärmenleri wekilçilik etdiler.
Duşuşykda söwda amallaryny sanlylaşdyrmak we hususy pudagyň söwda hem-de logistika mümkinçiliklerini ýokarlandyrmak meselesi ara alnyp maslahatlaşyldy.
Mejlisiň ikinji gününde logistika infrastrukturasyny ösdürmek, elektron şahadatnamalary girizmek, administratiw päsgelçilikleri azaltmak we sebit hyzmatdaşlygyny ýokarlandyrmak üçin söwda ýagdaýlaryny sazlaşdyrmak boýunça çäreleri ara alyp maslahatlaşmak üçin iş toparynyň ýygnaklary guraldy.
Gatnaşanlar serhetara söwdanyň netijeliligini ýokarlandyrmak üçin tehnologiýa integrasiýasynyň we bilelikdäki hereketleriň möhümdigini bellediler.
