Barlagçylar topary Plutonyň ulgamyny öwrenmek üçin “Persefona” missiýasyny teklip etdiler. Onuň dowamlylygy 50 ýyla çenli bolup biler diýip, Phys.org habar berýär.
Şeýle missiýa 2015-nji ýylda karlik planetasy ulgamynyň we onuň hemrasy Haronyň ýanyndan geçip giden New Horizons zondy barlanandan soň ýüze çykan möhüm ylmy soraglara jogap berer.
New Horizons ýer ýüzüne gymmatly maglumatlary berdi, ýöne täze soraglar ýüze çykdy. Alymlary Koýper guşagynyň obýektleriniň ewolýusiýasy we düzümi, Plutonyň we Haronyň üstündäki üýtgeşmeler, olaryň magnit meýdanlary we içki gurluşy gyzyklandyrýar. Plutonyň Günden uzakdygyna garamazdan, onuň ýüzüniň astynda ummanyň bolmagy mümkin diýen çaklamalar bar.
Missiýanyň taslamasy 31 ýyla niýetlenendir. Plutona uçup barmak üçin 28 ýyl gerek bolar, ýene üç ýyl missiýanyň orbital tapgyry bolar. Soňra bu missiýa Koýper guşagynyň beýleki obýektlerine hem giňeldilip bilner.
Apparat kameralar, spektrometrler, radarlar, magnitometrler, altimetrler we beýleki gurallar bilen üpjün ediler. Bu diňe bir Plutony we Harony däl, eýsem Ýupiter we onuň aýy ýaly ýolda duş gelen obýektleri hem öwrenmäge mümkinçilik berer.
Missiýanyň çak edilýän bahasy 3 milliard dollar. Uçuş 2031-nji ýylda SLS raketasynda amala aşyrylyp bilner. Missiýa üstünlikli bolsa Gün ulgamynyň iň uzak ýerleri barada bilimleri giňeltmäge mümkinçilik berer.
