Çendu awiasiýa barlag instituty we Hytaýyň awiasiýa senagaty korporasiýasy (AVIC) Hytaýyň dolandyrylýan uçuşlar kosmos gullugy (CMSA) tarapyndan yglan edilen bäsleşigiň çäklerinde işlenip düzülen täze Haolong ýük kosmos gämisiniň dizaýnyny hödürlediler. Taslama iki ýeňijiniň biri hökmünde saýlandy we önümçilige goýberilmezden ozal, barlag we işläp taýýarlaýyş tapgyrlaryndan geçer diýip, Space.com habar berýär.
Bäsleşik Ýeriň pes orbitasyna ýük äkitmek we getirmek üçin elýeterli, pilotsyz ulag döretmäge gönükdirilendir. Hytaýda NASA-dan görelde almak hem-de ylmy-barlag institutlary we önümçilik kompaniýalaryny şeýle apparatyň döredilişine çekmek kararyna geldiler. Teklip edilen wariantlardan ikisi, şol sanda häzirki wagtda düşünjäniň möhüm barlagyndan geçýän Haolong taslamasy saýlandy.
Kosmos gämisiniň esasy wezipesi - Tiangong orbital stansiýasyna goldaw bermekdir. Häzirki wagtda oňa tabşyrygyny tamamlandan soň, galyndy zibiller ýüklengi ýagdaýda atmosferada ýakylýan Týançou gämileri hyzmat edýär.
Synaglaryň ähli netijeleri ekipaž bilen bilelikde pilotly dolandyrylýan Shenzhou gämilerinde Ýere gaýtarylyp getirilýär, bu bolsa boş ýeri çäklendirip, oňaýsyzlyk döredýär.
Bar bolan maglumatlara görä, Haolongyň uzynlygy 10 metr we ini 8 metr, şattlyň ýük göterijilik ukyby 1,8 tonna bolar, bu Russiýanyň “Progressi” ýaly şuňa meňzeş ulaglaryňkydan azdyr. Şeýle-de bolsa, gämi köp gezek ulanmak üçin niýetlenendir.
NASA-nyň eýýäm şuňa meňzeş taslamasy bar - Sierra kompaniýasynyň Dream Chaser gämisi hem raketa arkaly orbita iberiler we şondan soň awtomatiki usulda uçuş-gonuş zolagyna gonar. Dream Chaser-iň ilkinji uçuşyny 2025-nji ýylda amala aşyrmak meýilleşdirilýär.
