SpaceX-iň öňki inženeri Hans Kýonigsmann Blue Origin kompaniýasynyň New Shepard raketasynda 2025-nji ýylyň noýabr aýynda suborbital uçuşa gatnaşmagy meýilleşdirýändigini aýtdy diýip, Ars Technica ýazýar.
Kýonigsmann — SpaceX-iň ilkinji we iň abraýly işgärleriniň biridir. Ilon Mask 2002-nji ýylda kompaniýany esaslandyranda, oňa diňe birnäçe adam goşulypdy. Hereketlendirijilere jogapkär Tom Mýuller we raketanyň gurluşyny işläp düzen Kris Tompson bilen bir hatarda Kýonigsmann hem ilkinji gatnaşanlardan bolupdy. Ol Falcon 1 uçarlarynyň dolandyryş ulgamlarynyň döredilmegine ýolbaşçylyk edip, SpaceX uçuşlarynyň howpsuzlygyna hem jogapkärdi. Kompaniýada takmynan 20 ýyl işläp, 2021-nji ýylyň ahyrynda ol ýerden gitdi.
Uçuşda onuň dosty Mihaela “Miçi” Bentaus hem ýoldaş bolar. Bu waka taryhy ähmiýete eýe bolar — sebäbi Bentaus maýyp arabasyndaky ilkinji adam hökmünde suborbital uçuşa gatnaşar. 2018-nji ýylda welosiped sürüp barýarka, ol heläkçilige uçrap, oňurga ýiligine şikes ýetiripdi.
Blue Origin kompaniýasy NS-37 missiýasynyň takyk senesini we ekipažyň doly düzümüni ýakyn günlerde resmi taýdan yglan eder.
