Türkmenistanda saglygy goraýyş işgärleri üçin çagalara we täze doglan bäbeklere gaýragoýulmasyz kömek hyzmatyny guramak boýunça okuw geçildi. Bu barada "Türkmenistan: Altyn asyr" elektron neşiri habar berýär.
Türkmenistanyň Saglygy goraýyş we derman senagaty ministrligi tarapyndan Birleşen Milletler Guramasynyň Çagalar gaznasy bilen bilelikde guralan okuwlara Aşgabadyň we ýurdumyzyň bäş welaýatynyň wekilleri gatnaşdylar.
Okuwy halkara hünärmenler Dmitriý Sankawes we Mihail Strižak alyp bardy. Okuwyň nazary bölegi Halkara okuw-ylmy merkezinde, amaly bölegi bolsa Enäniň we çaganyň saglygyny goraýyş ylmy-kliniki merkezinde geçirildi.
Okuwyň netijesinde saglygy goraýyş işgärleri bäbekler we çagalar babatynda adatdan daşary ýagdaýlary dolandyrmak endiklerini ösdürdiler. Bu başlangyç, 2021–2025-nji ýyllar üçin «Sagdyn ene – sagdyn çaga – sagdyn gelejek» atly milli strategiýanyň maksatlaryna laýyk gelýär. Bu maksatnama saglygy goraýyş ulgamynyň çagalara ýokary hilli we elýeterli ideg bermek mümkinçiligini güýçlendirýär.
Saglygy goraýyş işgärleriniň idegiň möhüm jähetleri boýunça mümkinçiliklerini yzygiderli artdyrmak bäbekleriň we çagalaryň arasynda diri galma derejesini ýokarlandyrmak we maýyplygy azaltmak üçin, möhüm çäredir.
