Filippinlerde täze bir özüne çekiji ýer peýda boldy: Günbatar Negros welaýatynyň uly bolmadyk dynç alyş şäheri Kampuestohanda horaz şekilinde otel guruldy. Beýikligi 35 metr bolan bina bu guşuň şekilindäki iň beýik desga hökmünde Ginnesiň rekordlar kitabyna girdi.
Taslama işine alty aý töweregi wagt sarp edildi, 2023-nji ýylyň sentýabr aýynda başlanan gurluşyk bolsa 2024-nji ýylyň oktýabr aýynda tamamlandy.
“Men ünsi çekjek we medeniýetimizi görkezjek üýtgeşik bir zady döretmek isledim. Bu horaza serediň: ol parahat we hökümli, haýbatly we güýçli görünýär, ol güýçli ýele garşy durmagy we bäsdeşleriň basyşyna çydamagy başarýar – bu biziň halkymyzyň islendik kynçylyklardan, çökgünliklerden we synaglardan soň çalt dikelmäge mümkinçilik berýän esasy häsiýetlerini görkezýär. Bizde söweşjeň horazlary köpeltmek senagaty diňe şeker önümçiliginden yza galýar” – diýip, dynç alyş ýeriniň müdiri Rikardo Kano Gwapo Tan gürrüň berýär.
Ol oteliň sebitiň ýaşaýjylaryny gyzyklandyryp biljekdigini, sebäbi söweşjeň horazlaryň ýerli medeniýetiň we ykdysady durmuşyň aýrylmaz bölegidigini sözüniň üstüne goşdy.
“Haçan-da biziň şeker senagatymyz çökgünlik bilen ýüzbe-ýüz bolanda, hut söweşjeň guşlaryň köpeldilmegi köp hojalyklara goldaw berdi” – diýip, Tan belledi.
Binanyň açylmagy ýerli KHBS-iň ünsüni özüne çekdi, dabara bolsa Ginnesiň kitabynyň şahadatnamasynyň gowşurylmagy bilen utgaşdy.
“Men hem buýsanýaryn, hem tolgunýaryn. Öz welaýatymy we eziz ýurdumy Ginnesiň rekordlar kitabyna girizendigime buýsanýaryn. Tolgunmagymyň sebäbi bolsa, men garyplykda ulaldym we iýjegimi gazanmak, mekdebe gitmek üçin köwüş arassalaýjy bolup işläpdim. Ýöne indi meniň maşgalam, welaýatym we ýurdum bu üstünlige buýsanyp biler”.
Otelde kondisioner, uly krowat, duş, telewizor we beýleki amatlyklary bolan 15 otag bar. Oteliň çäginde tolkunly uly basseýn we üç sany ýüzmek üçin basseýn, restoran, kafe, ýerli stilde külbeler bar. Çagalary begendirmek üçin bolsa dinozawrlaryň we supergahrymanlaryň ýüzlerçe şekili goýuldy.
