6-njy noýabrda Türkmenistanyň daşary işler ministri Raşid Meredow eýranly kärdeşi Seýed Abbas Aragçi bilen telefon arkaly söhbetdeş boldy. Bu barada Türkmenistanyň daşary syýasat edarasynda habar berdiler.
Söhbetdeşligiň barşynda taraplar iň ýokary derejedäki gatnaşyklaryň depginli ösüşini bellediler. Şu nukdaýnazardan, şu ýylda geçirilen duşuşyklarynyň dowamynda gazanylan ylalaşyklaryň durmuşa geçirilişiniň barşyna garaldy.
Daşary syýasat edaralarynyň ýolbaşçylary ýakyn geljekde ikitaraplaýyn we köptaraplaýyn görnüşdäki duşuşyklary geçirmegi nazara almak bilen, daşary işler ministrlikleriniň arasyndaky hyzmatdaşlygy işjeňleşdirmegiň möhümdigini bellediler.
Ministrler iki ýurduň arasyndaky söwda-ykdysady gatnaşyklaryň wajypdygyny nygtadylar. Ykdysady hyzmatdaşlyk boýunça türkmen-eýran hökümetara toparynyň işine aýratyn üns berildi, onuň nobatdaky 18-nji mejlisini ýylyň ahyryna çenli geçirmek göz öňünde tutulýar.
Şeýle-de taraplar medeni-ynsanperwer gatnaşyklaryň ösüşini ara alyp maslahatlaşdylar. Medeniýet ulgamynyň ikitaraplaýyn hyzmatdaşlygyň möhüm ugurlarynyň biri bolup durýandygy nygtaldy.
Şunuň bilen baglylykda, söhbetdeşler şu ýylyň noýabr-dekabr aýlarynda bilelikdäki çäreleri, şol sanda «Iran Agro Food» sergisini, Çagalaryň dostlugy hepdeligini, zergärçilik boýunça ussatlyk sapaklaryny we ş.m. geçirmek barada ylalaşdylar.
