Warşawa uniwersitetiniň arheologlary Gruziýada ýerleşýän Gonio rim galasyndan gadymy rim esgerleriniň howandary keramatly Ýupiter Dolihene sadaka hökmünde bagyşlanan täsin altyn tabagy tapdylar. Bu barada Arkeonews habar berýär.
Bu açyş, takmynan 2000 ýyl ozal Rimiň Kapadokiýa welaýatynyň serhedinde gurlan gadymy galanyň çäginde her ýyl geçirilen gazuw-agtaryş işleriniň netijesinde ýüze çykaryldy.
Batuminiň golaýynda saklanyp galan Gonio rim galasy esgerler tarapyndan diňe bir harby baza hökmünde ulanylmandyr. Täze geçirilen gazuw-agtaryş işleriniň görkezişi ýaly, bu ýerde rim harby düşelgeleri üçin adaty bolmadyk iri keramika we çakyr önümçiligi bolupdyr.
Alymlaryň bellemegine görä, şeýle seýrek hem oňat goralýan tapyndynyň ýüze çykarylmagy rim esgerleriniň arasynda Ýupiter Doliheniň dini täsirini görkezýär.
Arheologlar Ýupitere sadaka hökmünde bagyşlanan altyn tabakdan başga-da, bu ýerden hudaýyň hökmürowan (kult) taraplaryny alamatlandyrýan öküziň we bürgüdiň bürünçden ýasalan heýkellerini tapdylar.
