20-21-nji noýabrda Lebap welaýatynyň Türkmenabat şäherinde özbek harytlarynyň milli sergisini hem-de Ikinji türkmen-özbek sebitara forumyny geçirmek meýilleşdirilýär. Bu baradaky teklibi anna güni Hökümet mejlisinde wise-premýer B.Atdaýew hödürledi.
Bellenilişi ýaly, bu çäreleri Türkmenistanyň we Özbegistanyň çäginde özara sergileri geçirmek hakynda degişli resminamalaryň esasynda guramak meýilleşdirilýär.
Türkmenistanyň Prezidenti ýurdumyzda hoşniýetli goňşuçylyk däplerine esaslanyp, goňşy döwletler bilen söwda-ykdysady gatnaşyklaryň yzygiderli ösdürilýändigini, bu ugurda Özbegistan Respublikasy bilen hyzmatdaşlygy ösdürmäge uly ähmiýet berilýändigini nygtady. Döwlet Baştutany noýabr aýynda Türkmenabat şäherinde Özbegistan Respublikasynyň milli sergisini we Ikinji sebitara forumy geçirmek baradaky teklibi goldap, wise-premýere degişli işleri geçirmegi tabşyrdy.
Belläp geçsek, şu ýylyň 15-16-njy iýulynda Daşkent şäherinde “Türkmenistanda öndürilen” atly ýurdumyzyň harytlarynyň milli sergisi geçirildi.
