“Lamborgini: rowaýaty adam” we “Ferrari” filmleri bilen tanalýan italiýaly prodýuser Andrea Ierwolino premium awtomobilleriň taryhy bilen baglanyşykly nobatdaky taslama girişdi. Bu gezek ol Bugatti kompaniýasyny esaslandyryjy Ettore Bugatti hakynda biografik film çykarar. Bu barada Deadline neşiri habar berýär.
Film şu ýyl surata düşürilip başlanar we Italiýada hem Fransiýada geçiriler. Ol belli markanyň döredilişi we 1939-njy ýylda ogly Žany ýitiren Ettoreniň şahsy betbagtçylygy barada gürrüň berer. Žan Bugatti täze awtomobiliň synag wagty ölýär, bu hem onuň kakasy üçin agyr zarba bolýar.
Häzirki wagtda Ierwolino režissýorlar we ssenariýaçylar bilen gepleşikleri geçirip, iňlis dilinde düşüriljek filmiň üstünde işlemek üçin halkara topary döredýär.
Öň, biz prodýuseriň tiz wagtdan “Mazerati: Doganlar” biografik filminiň surata düşürilişine goşuljakdygyny habar beripdik. Filmde baş keşpleri Mikele Marrone we Entoni Hopkins ýerine ýetirer, režissýor hökmünde Bobbi Moresko çykyş eder.
