15-nji oktýabrda Türkmenistanyň DIM-niň Halkara gatnaşyklary institutynda Magtymguly Pyragynyň özbek dilindäki goşgular ýygyndysynyň tanyşdyrylyş dabarasy geçirildi. Bu barada Türkmenistanyň daşary syýasat edarasynda habar berdiler.
Çärä Türkmenistan DIM-niň, Özbegistanyň ylmy intellegensiýadan ybarat bolan wekiliýetiniň agzalary, Türkmenistanda akkreditlenen diplomatik wekilhanalaryň agzalary, ylym-bilim pudagynyň işgärleri, professor-mugallymlar we talyp ýaşlar gatnaşdylar.
Dabarada çykyş edenler görnükli şahyryň döredijilik mirasynyň medeni gatnaşyklary giňeltmekde hem-de ýurtlary we halklary ýakynlaşdyrmakda möhüm köpri bolup hyzmat edýändigini bellediler. Şeýle-de Gündogar halklarynyň dilleriniň we edebiýatynyň arasyndaky arabaglanyşyga seljerme berdiler we şahyryň eserleriniň ýaşlary watançylyk ruhunda terbiýelemekdäki ähmiýetini açyp görkezdiler.
Çykyşlaryň dowamynda Magtymgulynyň döredijilik mirasynyň milli çäkleriň daşyna çykandygyny we dünýä medeniýetiniň hazynasynyň aýrylmaz bölegidigini nygtadylar.
Tanyşdyrylyş dabarasynyň çäginde Merkezi Aziýa döwletleriniň milli şekillendiriş we amaly-haşam sungatynyň eserleriniň, muzeý eksponatlarynyň, Magtymguly Pyragynyň ömri we döredijiligine bagyşlanan kitaplaryň sergisi guraldy. Şeýle hem çärä gatnaşyjylarda uly täsir galdyran şahyr hakynda bilelikdäki türkmen-özbek terjimehal filminiň bölekleri görkezildi.
