«Demirýollary» açyk görnüşli paýdarlar jemgyýeti täze hyzmaty – «Bir gezeklik ýapynjalary» hödürläp başlady. Bu ädim ýolagçylaryň has arassa hem rahat syýahat etmeklerini üpjün etmäge gönükdirilendir.
“Bir gezeklik ýapynjalar ýolagçylara tämiz düşekleri elýeterli etmek arkaly mikroblar bilen galtaşma ähtimallygyny azaldýar” diýip, “Demirýollary” AGPJ belleýär.
Ýolagçylar ýapynjalaryň arassalygyny we diňe özleri tarapyndan ulanylýandygyny bilip has rahat syýahat ederler. Bu täzelik her bir ýolagça şahsy çemeleşme esasynda hyzmat edilýändigini görkezýär.
“Demirýollary” AGPJ ähli ýolagçylaryň howpsuz, rahat we amatly syýahat etmegini gazanmaga ymtylýar.
“Bir gezeklik ýapynjalary hödürlemek bilen ähli ýolagçylaryň arassaçylyk tarapdan bolan isleglerini kanagatlandyrarys hem-de otlularyň gigiýeniki we rahatlyk şertlerini ýokarlandyrmaga tarap täze ädim edýäris” diýip, AGPJ-niň hünärmeni belleýär.
“Bir gezeklik ýapynjalary” kassadan, terminaldan ýa-da onlaýn görnüşde «Türkmenistan Railways» ykjam goşundylaryndan bilet alnanda, ýapynja görnüşini saýlap alyp bolýar. Ýapynjanyň bahasy biletiň umumy bahasyna goşular we satyn alyş işini ýönekeý hem amatly eder.
