12-nji oktýabrda Türkmenistanyň DIM-nde daşary işler ministri Raşid Meredowyň ÝUNESKO-nyň Baş konferensiýasynyň başlygy hanym Simona-Mireo Mikulesku bilen duşuşygy geçirildi. Bu barada Türkmenistanyň daşary syýasat edarasynyň saýtynda habar berildi.
Duşuşygyň barşynda taraplar Türkmenistan bilen ÝUNESKO-nyň arasynda hyzmatdaşlygyň ýokary derejesini belläp geçdiler. Türkmenistanda geçirilýän medeni-ynsanperwer häsiýetli çäreleriň ýokary derejesi bellenip geçildi. Aşgabatda üstünlikli geçirilen «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly halkara forumyna aýratyn üns berildi.
Taraplar şeýle hem “Ahalteke atçylyk sungaty we atlary bezemek däpleri” atly milli hödürnamanyň ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilmeginiň möhüm ähmiýetini belläp geçdiler. Degişli şahadatnama Arkadag şäherinde dabaraly ýagdaýda gowşuryldy.
Duşuşygyň barşynda taraplar şeýle hem arhiwleşdirmek, sanlylaşdyrmak, ylym we bilim ulgamlary babatda özara gatnaşyklary giňeltmegi maslahatlaşdylar.
