9-njy oktýabrdan başlap, Aşgabatda №18, №32 we №46 awtobus ugurlary täze ugur boýunça hereket edip başlady. Bu barada “Türkmenawtoulaglary” agentliginiň resmi saýtynda habar berilýär.
Bellenilişi ýaly, awtobus hyzmatynyň hilini ýokarlandyrmak we ilatyň ýol ulagyndaky zerurlyklaryny kanagatlandyrmak maksady bilen, Aşgabatda aşakdaky görkezilen belgili awtobuslaryň ugurlary üýtgeýär:
- «Parahat - Howa menzili» №18 awtobus ugry N.Andalyp köçesinden Görogly köçesine tarap gönükdiriler.
- «Awtokombinat - Kardiologiýa merkezi» №32 awtobus ugry indi Arçabil şaýolunyň halkasyndan öwrülip, N. Andalyp köçesine tarap yzyna gaýdar.
- «Gurtly - Halkara nebit we gaz uniwersiteti» №46 awtobus ugry bolsa ugruny N.Andalyp köçesinden Arçabil şaýoly aýlawyndan günbatar tarapa Türkmenbaşy-Arçabil şaýollarynyň aýlawyndan gündogarlygyna aýlanyp "Mukamlar" köşgüne we "Nebit we Gaz uniwersiteti" duralgasyna, yzyna gelen ýoly bilen N.Andalyp köçesinden gaýdar.
