Türkmenistanyň daşary işler ministriniň orunbasary Mähri Bäşimowa Ýewropa daşary gatnaşyklar gullugynyň Merkezi Aziýa ýurtlary boýunça bölüminiň başlygy Ditmar Krissleriň ýolbaşçylygyndaky Ýewropa Komissiýasynyň wekiliýeti bilen duşuşdy.
4-nji oktýabrda Türkmenistanyň DIM-nde geçirilen duşuşykda «Merkezi Aziýa – Ýewropa Bileleşigi» formatynyň çägindäki özara gatnaşyklar boýunça pikir alşyldy. Taraplar Türkmenistanda durmuşa geçirilýän möhüm ugurlardaky ÝB-niň taslamalarynyň netijeliligini bellediler.
Hyzmatdaşlygyň ileri tutulýan ugurlarynyň hatarynda sebit howpsuzlygy we ösüş meseleleri, howanyň üýtgemegi, daşky gurşawy goramak, «ýaşyl» we sanly özgertmeler, energetika we ulag-logistika pudagynda hyzmatdaşlyk bellenildi.
Söhbetdeşler täze üstaşyr ulag geçelgelerini döretmek meselelerine degip geçip, Hazarüsti ulag geçelgesiniň utgaşdyryjy platformasyny işe girizmegiň sebitiň durmuş-ykdysady taýdan durnukly ösmegine ýardam berjekdigini nygtadylar diýip, Türkmenistanyň DIM-niň metbugat gullugy habar berýär.
